၂၀၁၄-၉-၁၀
(နိုင်ငံရေးဦးတည်ချက်)
အမျိုးသားဒီမိုကရေစီအဖွဲ့ချုပ်သည် နောင်ခေတ်အဆက်ဆက်၌ အများပြည်သူတို့၏ဆန္ဒနှင့်အညီ အခြေခံလူ့အခွင့်အရေးများကိုအာမခံမည့် စစ်မှန်သောဒီမိုကရေစီစနစ်ထွန်းကား အခြေခိုင်စေပြီး စည်းလုံးညီညွတ်သော တည်တံ့ခိုင်မြဲသော တိုင်းရင်းသားလူမျိုးများ၏ တန်းတူရည်တူ အခွင့်အရေး
ရှိသော ဒီမိုကရေစီပြည်ထောင်စုသစ်ကြီး တည်ထွန်းစေရန်နှင့် ကျွန်ုပ်တို့သာမက နောင်လာမည့်
မျိုးဆက်များအဖို့ မည်သည့်အခါမျှ ဒီမိုကရေစီ အခွင့်အရေးများ မဆုံးရှုံးစေရဟူသောမူဖြင့် ခိုင်မာမြဲမြံသောဒီမိုကရေစီအုတ်မြစ်ကို စိုက်ထူချမှတ်ရန် အောက်ပါအတိုင်း ဦးတည်ဆောင်ရွက်မည်။
(က)အာဏာရှင်ဆန်၍ ပြည်သူလူထုကို ဖိနှိပ်ချုပ်ချယ်မည့်နိုင်ငံရေးစနစ်မျိုး ထွန်းကားခြင်းမရှိစေရ။
(ခ)ပြည်သူ့ဆန္ဒကိုအချုပ်အခြာအဖြစ်ခံယူ၍ နိုင်ငံတော်အာဏာကို မူလပိုင်ရှင်ဖြစ်သော ပြည်သူ
လူထုထံမှဆင်းသက်စေရမည်။
(ဂ)နိုင်ငံသားတိုင်းလွတ်လပ်စွာယုံကြည်ကိုးကွယ်ခွင့် တွေးခေါ်ခွင့် ရေးသားဟောပြောခွင့် စည်းရုံး
ခွင့်နှင့် အသက်မွေးဝမ်းကျောင်းပြုပိုင်ခွင့် ဆန္ဒမဲပေးပိုင်ခွင့်နှင့် ရွေးကောက်တင်မြှောက်ခံပိုင်ခွင့် စသည့် ပြည်သူတို့၏ အခြေခံလွတ်လပ်ခွင့်တည်းဟူသော လူတစ်ဦးချင်းစီ၏ အခြေခံပိုင်ခွင့်များကို အပြည့်အဝခံစားခွင့် ရှိစေရမည်။
(ဃ)ဖွဲ့စည်းအုပ်ချုပ်ပုံ အခြေခံဥပဒေ၌ အခြေခံလူ့အခွင့်အရေးများကို အတိအလင်းအာမခံမည့် လူ့အခွင့်အရေးဆုံးရှုံးနစ်နာမှုများအတွက် အခြေခံဥပဒေအရဖြစ်စေ သို့တည်းမဟုတ် သီးခြားအထူးဥပဒေပြဋ္ဌာန်း၍ဖြစ်စေ တရားရုံးများ၌ တရားစွဲဆိုခွင့် ရရှိရန်ပြဋ္ဌာန်းမည်။
(င)ပြည်သူ့ဆန္ဒအရ ရွေးချယ်တင်မြှောက်သော ပြည်သူ့လွှတ်တော်၏ အချုပ်အခြာအာဏာကို အကြွင်းမဲ့ကျင့်သုံးနိုင်ခွင့်ရှိစေရမည်။
(စ)ပြည်သူ့လွှတ်တော်သည် အချုပ်အခြာအာဏာကို ဥပဒေပြုရေး အုပ်ချုပ်ရေးနှင့် တရားစီရင်ရေး
ဟူ၍ အပိုင်းသုံးပိုင်းဖြင့် ခွဲဝေကျင့်သုံးရာတွင် ထိုအာဏာသုံးရပ်အတွက် တူညီသော အဆင့်အတန်း
ဖြင့် လွတ်လပ်စွာရပ်တည်၍ တစ်ခုအပေါ်တစ်ခု လွှမ်းမိုးခြင်း စွတ်ဖတ်ခြင်း မရှိစေရန် အောက်ပါ
အတိုင်းသက်မှတ်ဆောင်ရွက်မည်။
***********************************
(ဥပဒေပြုရေးမဏ္ဍိုင်)
(1)ဥပဒေများကိုပြဋ္ဌာန်းခြင်း ပြင်ဆင်ခြင်း ပယ်ဖျက်ခြင်းစသည့်လုပ်ငန်းများ ဆောင်ရွက်ရာ၌
တရားမျှတခြင်း လွတ်လပ်ခြင်း ညီမျှခြင်းတည်းဟူသော လောကပါလတရားများနှင့်အညီ ဖြစ်စေ၍ ဖွဲ့စည်းအုပ်ချုပ်ပုံအခြေခံဥပဒေ ပေါ်ပေါက်လာပါက ထိုဥပဒေနှင့်အညီ ရွေးကောက်တင်မြှောက်
ထားသော ပြည်သူ့လွှတ်တော်ကသာ ဥပဒေပြုခြင်း ပယ်ဖျက်ခြင်းတို့ကို ဆောင်ရွက်ခွင့်ရှိရမည်။
(2)ဒီမိုကရေစီစနစ်နှင့်မညီသော ဥပဒေများ လွတ်လပ်သောတရားစီရင်ရေးကို ပိတ်ပင်ဟန့်တား
သောဥပဒေများ ပြည်သူလူထုအပေါ်ဖိနှိပ်ချုပ်ခြယ်သော ဥပဒေများကိုပြင်ဆင်သွားမည်။
အုပ်ချုပ်ရေးမဏ္ဍိုင်သည် မည်သည့်အထူး တရားခုံရုံးကိုမျှ ဖွဲ့စည်းခြင်းမပြုရ အုပ်ချုပ်ရေးမဏ္ဍိုင်နှင့်
ဆက်နွယ်သော မည်သည့်အဖွဲ့အစည်းကိုမျှ တရားစီရင်ခွင့်အာဏာမအပ်နှင်းရ။ တရားစီရင်ရေး
မဏ္ဍိုင်ကို လွှမ်းမိုးချယ်လှယ်ခြင်းမပြုစေရ။
အုပ်ချုပ်ရေးယန္တရားသည် ပြည်သူလူထုကြီးအား ဖိနှိပ်သည့်ကရိယာမဖြစ်စေဘဲ ပြည်သူလူထုကြီး၏ အကျိုးစီးပွါးကို သယ်ပိုးဖြည့်ဆည်းကာကွယ်ပေးမည့် အရည်အသွေးမှီသော စီမံခန့်ခွဲမှုယန္တရားဖြစ်စေ
ရမည်။
***********************************
(တရားစီရင်ရေးမဏ္ဍိုင်)
နိုင်ငံသားတိုင်းလူမျိုးမရေး ဘာသာမရွေး ရာထူးဌာနန္တရမရွေး လိမ်မခွဲခြားဘဲ နိုင်ငံတော်တရားဥပဒေ အရာတွင် အညီအမျှဖြစ်စေရမည်။
တရားရုံးချုပ်သည် မိမိ၏လက်အောက်ရှိ တရားရုံးများအားလုံးကို ပြင်ပစွတ်ဖတ်ခြင်းကင်းစွာ လုံးလုံးလျားလျားကွပ်ကဲပိုင်ခွင့်ရှိစေရမည်။
တရားသူကြီးများသည် ဖွဲ့စည်းအုပ်ချုပ်ပုံအခြေခံဥပဒေအရ အပ်နှင်းထားသော အာဏာနှင့်
ပြဋ္ဌာန်းချက်များကိုသာ လိုက်နာကျင့်သုံး၍ လွတ်လပ်စွာတရားစီရင်ပိုင်ခွင့်ရှိစေရမည်။
တရားစစ်ဆေးခြင်းနှင့် ဆုံးဖြတ်ခြင်းများကို အများပြည်သူတို့ရှေ့မှောက်တွင် စီရင်ကြေငြာရမည်။ စွပ်စွဲခံရသူအား တရားဥပဒေနှင့်အညီခုခံပိုင်ခွင့် အပြည့်အဝပေးအပ်ရမည်ဖြစ်ရာ နိုင်ငံတော်အာဏာ
ကို အထက်ပါအတိုင်း ခွဲဝေကျင့်သုံးရာ၌ အာဏာပိုင် တစ်ဖွဲ့ဖွဲ့ကဖြစ်စေ လူပုဂ္ဂိုလ်တစ်ဦးဦးကဖြစ်စေ မိမိတို့အာဏာကို မတရားကျူးကျူးလွန်လွန် အသုံးချမှုကိုမဖြစ်ပေါ်စေဘဲ ဟန့်တားနိုင်ရေးအတွက် ဒီမိုကရေစီကျင့်ထုံးအရ ကျင့်သုံးနိုင်ရန် ရည်ရွယ်ထားရှိရမည်။
***********************************
(နိုင်ငံတော်ကာကွယ်ရေးကဏ္ဍ)
ဒီမိုကရေစီစနစ်အရ နိုင်ငံတော်အာဏာကိုမဏ္ဍိုင်(၃)ရပ်ဖြင့် ဥပဒေပြုမှု တရားစီရင်မှုနှင့် အုပ်ချုပ်ရေး မဏ္ဍိုင်စသည်ဖြင့် ခွဲဝေကျင့်သုံးရာတွင် တပ်မတော်နှင့် နိုင်ငံတော်ကာကွယ်ရေးယန္တရား တစ်ရပ်လုံး
သည် အုပ်ချုပ်ရေးမဏ္ဍိုင်ထဲ၌သာ တည်ရှိနေရမည်ဖြစ်ပြီး နိုင်ငံတော်ဖွဲ့စည်းအုပ်ချုပ်ပုံအခြေခံဥပဒေ
ကို လေးစားလိုက်နာကာပြည်သူ့ဘ်မှရပ်တည်သော ပြည်သူချစ်သောတပ်မတော်ကြီးဖြစ်ရမည်။ နိုင်ငံတော်ကာကွယ်ရေးကဏ္ဍသည် ထူးခြားသည့်အခြေအနေအချိန်အခါများတွင်သာ သီးသန့်မဏ္ဍိုင်
ကဲ့သို့ အရေးပါအရာရောက်စေရမည်ဖြစ်ပြီး မည်သို့သောအကြောင်းကြောင့်မျှ မဏ္ဍိုင်တစ်ခုနှင့်တစ်ခု စွတ်ဖတ်ခြင်း ကျူးကျော်ခြင်းမရှိစေဘဲ အပြန်အလှန်လေးစားလိုက်နာခြင်းတို့ဖြင့် မဏ္ဍိုင်တစ်ခုနှင့်
တစ်ခုအကြား မလွှမ်းမိုးနိုင်ရန် ထိန်းချုပ်မှုရှိရမည်ဖြစ်သည်။
နိုင်ငံတော်ကာကွယ်ရေးတာဝန်ကို ပထဝီသဘာဝအခြေအနေများနှင့် ကိုက်ညီသော ကာကွယ်ရေး
မဟာဗျူဟာအရ စစ်ရေးစွမ်းရည်ထက်မြတ်၍ နည်းပညာပိုင်းဆိုင်ရာ တိုးတက်သောတပ်မတော်
အဖြစ် ခေတ်မီ၍အဆင့်အတန်းမြင့်မားအောင် တည်ဆောက်သွားမည်ဖြစ်သည်။
ပြည်သူ့စစ်အသွင်ဖြင့်လည်းကောင်း အသက်ပြည့်သူတိုင်းအလှည့်ကျ စစ်မှုထမ်းသည့် စနစ်တို့ဖြင့် လည်းကောင်း နိုင်ငံတော်ကာကွယ်ရေးကဏ္ဍကိုထိရောက်စွာ အားဖြည့်ထားရှိရမည်။ ဤနည်းဖြင့်တပ်မတော်နှင့်ပြည်သူ တစ်သားတည်းကျကာ ပြည်သူ့တပ်မတော်အသွင်ကို ပီပြင်စွာ
ဆောင်ရွက်စေရမည်ဖြစ်သည်။
ပြည်သူလူထုမှရွေးချယ်တင်မြှောက်ထားသော အစိုးရအဖွဲ့ကို တပ်မတော်နှင့်ကာကွယ်ရေးကဏ္ဍ တစ်ခုလုံးမှ တာဝန်ခံရမည်ဖြစ်ပြီး ထိုတာဝန်ကိုလွတ်လပ်တိကျစွာ ထမ်းဆောင်နိုင်ရန် ပြည်သူတို့၏
ယုံကြည်ကိုးစားမှုကိုခံရသော ပြည်သူ့တပ်မတော်အသွင်ဆောင်ကာ ပါတီနိုင်ငံရေးနှင့် ကင်းရှင်းစွာ ရပ်တည်ရမည်။
ကျဆုံးသွားသော စစ်မှုထမ်းများနှင့် ယင်းမိသားစုများ၏အကျိုးစီးပွါးအတွက် ဘဝအာမခံချက်များ
ရှိစေအံ့သောငှါ သင့်လျှော်သောအစီအစဉ်များအပြင် လိုအပ်သောဥပဒေပြဋ္ဌာန်း၍ ခံစားခွင့်ရှိစေရမည်။
***********************************
(တိုင်းရင်းသားလူမျိုးများအရေးကဏ္ဍ)
တိုင်းရင်းသားလူမျိုးအားလုံး၏အခွင့်အရေးအရတန်းတူညီမျှမှုကိုအသိအမှတ်ပြုကာ အမှန်တကယ်
သွေးစည်းညီညွတ်ရေးကိုရှေးရှု၍ စစ်မှန်သောပြည်ထောင်စုဘဝကို ဖေါ်ဆောင်နိုင်ရန်စိတ်ထား
စေတနာ ဖြူစင်ခြင်း ချစ်ကြည်ရင်းနှီးခြင်း တစ်ဦးအပေါ်တစ်ဦးပွင့်လင်းယုံကြည်ခြင်း အပြန်အလှန်လေးစားတန်ဖိုးထားခြင်းစသည့် ညီညွတ်ရေးအခြေခံများကိုဆောက်တည်၍ တိုင်းရင်းသားအားလုံးလက်တွဲမဖြုတ်စတမ်း ပြည်ထောင်စုကြီးတည်တံ့ခိုင်မြဲရေး ပြည်ထောင်စုကြီး
ဖွံ့ဖြိုးတိုးတက်ရေးနှင့် ပြည်ထောင်စုကြီးငြိမ်းချမ်းသာယာရေးတို့ကို ဦးတည်ရှေးရှုရမည်။
(က) ပြည်ထောင်စုဖွားတိုင်းရင်းသား လူမျိုးအားလုံး၏ အခွင့်အရေးတန်းတူရည်တူမှုကိုလက်ခံလျှက် မည်သည့်လူမျိုးကိုမျှ အထူးအခွင့်အရေးမပေးရေးနှင့် လူမျိုးနွယ် လူမျိုးစုအားလုံး၏ ခံစားထိုက် ခံစားအပ်သော မည်သည့်အခွင့်အရေးကိုမျှ ချုပ်ချယ်ကန့်သတ်မှုမပြုရေးကို ဦးတည်ရှေးရှုမည်။
(ခ) တိုင်းရင်းသားလူမျိုးအားလုံးသည် နိုင်ငံရေး အုပ်ချုပ်ရေး စီးပွါးရေးကဏ္ဍစသော နယ်ပယ်
အသီးသီး၌ လွတ်လပ်စွာဆောင်ရွက်နိုင်ရေးအတွက် ကိုယ်ပိုင်ပြဋ္ဌာန်းခွင့်ရှိရေးကို ဖွဲ့စည်းအုပ်ချုပ်ပုံ
အခြေခံ ဥပဒေနှင့်အညီ ဦးတည်ရှေးရှုမည်။
(ဂ) ဖွဲ့စည်းအုပ်ချုပ်ပုံအခြေခံဥပဒေသစ် မပေါ်ပေါက်မီကြားကာလအစီအစဉ်ဖြင့် ပြည်သူ့လွှတ်တော်
က ဥပဒေပြဋ္ဌာန်း၍ ရှိပြီးပြည်နယ်များအတွက် အာဏာပိုင်အဖွဲ့များ ဖွဲ့စည်းပေးရမည်။ နယ်ပယ်
အသီးသီး၌ တိုင်းရင်းသားလူမျိုးအချင်းချင်း ပူးပေါင်းဆောင်ရွက်မှု ကူညီရိုင်းပင်းမှု ဝိုင်းဝန်းပံ့ပိုးမှုဖြင့်
ပြည်ထောင်စုကြီးတစ်ခုလုံးနှင့် ပြည်ထောင်စုကြီး၏ဒေသအစိတ်အပိုင်း အသီးသီး၏ ဖွံ့ဖြိုးတိုးတက်
ရေးကို ဦးတည်ရှေးရှုမည်။
(ဃ) တိုင်းရင်းသားလူမျိုးဆိုင်းသည် မိမိတို့စာပေ ဘာသာစကား ယဉ်ကျေးမှု ဓလေ့ထုံးတမ်း
အစဉ်အလာများကို ထိန်းသိမ်းစောင့်ရှောက်ခွင့် ဖွံ့ဖြိုးတိုးတက်ခွင့်ရှိစေရမည်။
(င) ဒီမိုကရေစီစနစ်အောင်မြင်စွာ တည်ဆောက်နိုင်ချိန်တွင် ပြည်ထောင်စုကြီးတည်တံ့ခိုင်မြဲရေး ဖွံ့ဖြိုးတိုးတက်ရေး ငြိမ်းချမ်းသာယာရေး တိုင်းရင်းသားလူမျိုးအားလုံး သွေးစည်းညီညွတ်ရေးဟူသော ဒီမိုကရေစီလူ့ဘောင်၏ အခြေခံအုတ်မြစ်ကြီးများကို အခိုင်အမာချစေနိုင်ရန်အလို့ငှါ ပင်လုံညီလာခံ ကဲ့သို့သော ပြည်ထောင်စုကြီး၏ အနာဂါတ် ခရီးလမ်းညွှန်များကို ချမှတ်နိုင်မည့် တိုင်းရင်းသား
လူမျိုးပေါင်းစုံပါဝင်သော အမျိုးသားညှိနှိုင်းမှုညီလာခံတစ်ရပ်ကို ခေါ်ယူကျင်းပမည်။
(စ) တိုင်းရင်းသားလူမျိုးများသည် ပြည်ထောင်စုမြန်မာနိုင်ငံ၏ အချုပ်အခြာအာဏာတည်တံ့ခိုင်မြဲရေး တိုင်းရင်းသားလူမျိုးများအားလုံး စည်းလုံးညီညွတ်ရေး ဒီမိုကရေစီထွန်းကားရေး နိုင်ငံရေး စီးပွါးရေး
လူမှုရေး ပညာရေးကျန်းမာရေး ဒေသဖွံ့ဖြိုးရေးကိစ္စအစရှိသည်များကို ပြည်ထောင်စုတစ်ခုလုံး
အတိုင်းအတာဖြင့် ပါဝင်ဆောင်ရွက်စေရမည်။
***********************************
(ပြည်တွင်းငြိမ်းချမ်းရေးကဏ္ဍ)
ဒီမိုကရေစီပြည်ထောင်စုသစ်ကို အောင်မြင်စွာတည်ထောင်နိုင်ရေးအတွက် ပြည်ထောင်စုတွင်း
နှစ်ပေါင်း(၄၀)ကျော်တိုင်အောင် မပြီးဆုံးသေးသောလက်နက်ကိုင် တိုက်ခိုက်မှုများကို ပြည်ထောင်စု
အကျိုးအတွက်အပြီးတိုင်အဆုံးသက်ရန်အထူးလိုအပ်သည်ဟုယုံကြည်သည်။
နိုင်ငံတည်ဆောက်ရေးအင်အားတို့ကို ဆုတ်ယုတ်ခန်းခြောက်စေသော အဆိုပါ လက်နက်ကိုင်
တိုက်ခိုက်မှုများကို နိုင်ငံရေးနည်းအရ ဖြေရှင်းအဆုံးသက်စေမည်။ထိုသို့ဆောင်ရွက်ရာတွင် တိုင်းရင်းသားလူမျိုးများအကြား အမှန်တကယ်သွေးစည်းညီညွတ်ရေးကို စိတ်စေတနာဖြူစင်ခြင်း ချစ်ကြည်ရင်းနှီးခြင်း ပွင့်လင်းယုံကြည်ခြင်း အပြန်အလှန်လေးစား တန်ဖိုးထားခြင်း တည်းဟူသော အခြေခံတရားများဖြင့် တိုင်းရင်းသားလူမျိုးအားလုံး၏ အခွင့်အရေးအရ တန်းတူညီမျှမှုကို အလေးထားကာ ပြည်သူတစ်ရပ်လုံးလိုလားသော ပြည်တွင်းငြိမ်းချမ်းရေးကို ရရှိအောင် ကြိုးပမ်းဖေါ်ဆောင်သွားမည်။
***********************************
(ပညာရေးကဏ္ဍ)
ဒီမိုကရေစီစနစ်ထွန်းကားပြန့်ပွါး၍အခြေခိုင်စေရေးမှာ ပြည်သူလူထု၏ပညာရေးအဆင့်အတန်း
မြင့်မားမှုသည်လည်း အရေးပါသောအချက်တစ်ချက်ဖြစ်သည်။ တိုးတက်သောနိုင်ငံများ၏ပုံစံကျနသော ပညာရေးကဏ္ဍတွင် အထူးခြားဆုံး အင်္ဂါရပ်တစ်ခုမှာ ချမှတ်ထားသည့်ပညာရေးစနစ်သည် တည်ငြိမ်ခိုင်မြဲချင်းရှိ၍ နိုင်ငံရေးအခြေအနေကိုလိုက်ကာ မကြာခဏပြောင်းလဲခြင်းကင်းသော ပညာရေးစနစ်မျိုးဖြစ်စေရမည်။
အနာဂါတ်မြန်မာနိုင်ငံကို ခေါင်းဆောင်မည့် လူငယ်မျိုးဆက်သစ်များကို အစမ်းသပ်ခံပညာရေးစနစ်မျိုးမှ ကင်းလွတ်စေရမည်။တစ်ဦးချင်းစီ၏ဖန်တီးနိုင်စွမ်းကို အားပေးသော ခေတ်မီ၍ အဆင့်အတန်းမြင့်သည့် အသက်မွေးဝမ်းကျောင်းနှင့် အဆင့်မြင့်နည်းပညာဆိုင်ရာ ဘာသာရပ်တို့ကိုခွဲခြားသင်ကြားသော ပညာရေးစနစ်ကိုကျင့်သုံးမည်။
ဥာဏ်ရည်ဥာဏ်သွေးအလိုက် ကြိုက်နှစ်သက်ရာပညာရပ်ကို လွတ်လပ်စွာရွေးချယ်သင်ကြားခွင့်အား အာမခံမည့်ပညာရေးစနစ်ကို ထူထောင်မည်။
စာမေးပွဲရလာဒ်အပေါ်မူတည်၍ လုံးလဝီရိယနှင့် ဥာဏ်စွမ်းဥာဏ်စတို့ကိုချုပ်ချယ်သောဘောင်ခတ်ထား
သည့် ပုံစံကိုက် ပညာရေးစနစ်မျိုးကိုဖယ်ရှား၍ လွတ်လပ်စွာပညာသင်ကြားခွင့်ကို ရှေးရှုဆောင်ရွက်
မည်။မသင်မနေရပညာရေးစနစ်ကို ဦးတည်၍ အထက်တန်းပညာကိုအမှန်တကယ် ဆင်းရဲသည့်
ကျောင်းသားများအား လုံလောက်သောထောက်ပံ့ကြေးစနစ်နှင့်ထူးချွန်သောကျောင်းသားများကို
ပညာသင်ဆု ထောက်ပံ့ရန် အစိုးရ လူမှုရေးအသင်းအဖွဲ့များနှင့် ပုဂ္ဂလိကစေတနာရှင်များ
ပူးပေါင်း၍ ဆောင်ရွက်ရန် ရည်ရွယ်လုပ်ဆောင်မည်။
ကျောင်းသားဘဝသာယာဖြောင့်ဖြူးရေး ကျောင်းသားအခွင့်အရေးကာကွယ်ရေးနှင့် လွတ်လပ်စွာ
ပညာသင်ကြားခွင့်တို့ကို ရှေးရှု၍ အမျိုးသားနိုင်ငံရေးကိုဦးတည်သည့် တစ်လုံးတစ်စည်းတည်းသော
ကျောင်းသားသမဂ္ဂကို လွတ်လပ်စွာထူထောင်ခွင့်ရှိစေရမည်။
တက္ကသိုလ်များရှိ တက္ကသိုလ်ကောင်စီတွင် ကျောင်းသားသမဂ္ဂကိုယ်စားလှယ်(၂)ဦးကို ပါဝင်စေ၍
ကျောင်းသားရေးရာကိစ္စများကို ကျောင်းသားများကိုယ်တိုင်ပါဝင်သည့် ဆောင်ရွက်ခွင့်နှင့် ဆုံးဖြတ်ခွင့်ရှိစေရမည်။
***********************************
(နိုင်ငံခြားရေးဝါဒကဏ္ဍ)
လွတ်လပ်ရေးရပြီးနောက်မြန်မာနိုင်ငံသည် ကြားနေဝါဒကိုကျင့်သုံးခဲ့သည်။ မြန်မာတို့၏ကြားနေရေးဝါဒသည် ကမ္ဘာ့နိုင်ငံရေးအခြေအနေနှင့်
ကိုက်ညီ၍ အလွန်ပင်သင့်လျှော်လျောက်ပတ်သည့် ဝါဒဟု ကမ္ဘာ့နိုင်ငံကြီးများ၏ အသိအမှတ်ပြုခြင်း
ကိုခံခဲ့ရသည်။
၁၉၆၀ပြည့်နှစ်လွန်များတွင် မြန်မာနိုင်ငံသည် တင်းမာသောကြားနေဝါဒကိုကျင့်သုံးခဲ့ပြီး နိုင်ငံတကာ
ငွေကြေးရန်ပုံငွေအဖွဲ့စသည်များနှင့် ကင်းကင်းနေခဲ့သည်။ ဘက်မလိုက်နိုင်ငံများအဖွဲ့အစည်းမှ နှုတ်ထွက်ခဲ့သည်အထိ အထီးကျန်ဖြစ်လာခဲ့သည်။
၁၉၇၀ပြည့်နှစ်များတွင် နိုင်ငံခြားရေးဝါဒကို နိုင်ငံတကာနှင့်အတန်အသင့်လိုက်လျောသော အနေဖြင့် ရှိလာသော်လည်း အကြံဥာဏ်နှင့် စီးပွါးရေးပူးပေါင်းဆောင်ရွက်မှုတို့ကို လုံးဝလက်မခံပဲ မြှီရှင်
မြှီစားပုံစံဖြင့်သာဆက်ဆံခဲ့သည်။ နိုင်ငံခြားတိုင်းပြည်များနှင့် နှစ်ဖက်အကျိုးတူစီးပွါးရေးပူးပေါင်း
ဆောင်ရွက်မှုကင်းမဲ့ခဲ့သည်။ သို့ဖြစ်ရာကျွန်ုပ်တို့ အမျိုးသားဒီမိုကရေစီအဖွဲ့ချုပ်သည် ဒီမိုကရေစီနှင့်
လျှော်ညီသော နိုင်ငံခြားဝါဒကိုကျင့်သုံးမည်။
နိုင်ငံတကာဆက်ဆံရေးတွင် အမှန်တကယ်တက်ကြွလွတ်လပ်သော နိုင်ငံခြားရေးဝါဒကိုကျင့်သုံး၍ နိုင်ငံရေးအရချစ်ကြည်ရင်းနှီးမှုရအောင် ဆောင်ရွက်မည်။ အထီးကျန်ဝါဒကိုစွန့်ပယ်ပြီး ကမ္ဘာ့နိုင်ငံများ
နှင့်ဆက်ဆံရာ၌ ပေါ်ပေါက်လာသောအရေးကြီးကိစ္စရပ်များတွင် တစ်ကမ္ဘာလုံးအတိုင်းအတာအရ မှန်ကန်သောဒီမိုကရေစီအခြေခံများဖက်က ခိုင်မာစွာရပ်တည်မည်။
နိုင်ငံအချင်းချင်းအကြား အကျိုးတူ စီးပွါးရေးလုပ်ငန်းများ ဖေါ်ထုတ်၍ ပူးပေါင်းဆောင်ရွက်ကြမည်။ အထူးသဖြင့်ဒေသဆိုင်ရာအဖွဲ့အစည်းများ စီမံကိန်းများတွင် နိုင်ငံအကျိုးနှင့် ဒေသအကျိုးကို ဦးတည်၍ လက်တွဲဆောင်ရွက်မည်။
ကမ္ဘာ့ကုလသမဂ္ဂ ကမ္ဘာ့ဘဏ် နိုင်ငံတကာငွေကြေးရန်ပုံငွေအဖွဲ့ စသည်တို့နှင့် ရင်းနှီးခိုင်မာစွာ ဆက်ဆံမည်။
***********************************
(လူထုဘဝသက်သာချောင်ချိရေးကဏ္ဍ)
အစိုးရကဦးဆောင်၍ လူထုဘဝသက်သာချောင်ချိရေး လူမှုဘဝလုံခြုံရေး ဘဝအရည်အသွေးပိုမိုကောင်းမွန်ရေး ကျန်းမာရေး ပညာရေး စာပေ အနုပညာ ယဉ်ကျေးမှု ကဏ္ဍစသည်တို့ဖွံ့ဖြိုးတိုးတက်ရေးအတွက် စွမ်းအားရှိသမျှကျယ်ပြန့်စွာ မြှင့်တင်ဆောင်ရွက်နိုင်ရန် ပုဂ္ဂလိကစေတနာရှင်များ အဖွဲ့အစည်းများနှင့် လုပ်ငန်းရှင်များကို လိုလားစွာ ဖိတ်ခေါ်ပူးပေါင်းမည်။
ပြည်သူတစ်ရပ်လုံး အထူးသဖြင့်အသက်အရွယ်ကြီးရင့်သူ ငွေအင်အားချို့တဲ့သူများ ကိုယ် စိတ် ကျန်းမာချမ်းမြေ့စွာ တင့်တောင့်တင့်တယ် နေထိုင်ရေးကို အစီအစဉ်ချမှတ်ဆောင်ရွက်မည်။
ကိုယ်လက်အင်္ဂါချို့ယွင်းသူများအား ခိုကိုးရာမဲ့သူများအား အကြံပေးခြင်း အလုပ်အကိုင်ရှာဖွေပေးခြင်း ရင်းနှီးစွာထိတွေ့ ဆွေးနွေးအားပေးခြင်းတို့ကို ရှေးရှုဆောင်ရွက်မည်။
ရေဘေး လေဘေး မီးဘေးစသည့် သဘာဝဘေးဒုက္ခသင့်သူများအတွက် ထိရောက်လျှင်မြန်သော ကယ်ဆယ်ရေးလုပ်ငန်းတို့ကို ဆောင်ရွက်မည်။
မိဘမဲ့နှင့် အရွယ်မရောက်သေးသော မတရားအဖိအနှိပ်ခံ စွန့်ပယ်ခံလူငယ်များအား ကူညီစောင့်
ရှောက်ရေး ဒုက္ခအန္တရာယ်များမကျရောက်စေရန် ကြိုတင်ကာကွယ်ရေးနှင့် ၄င်းတို့ကို လူမှုဘဝသက် သာချောင်ချိရေးကို ဆောင်ရွက်မည်။
အမျိုးသမီးစောင့်ရှောက်ရေးအသင်းအဖွဲ့များကို အစိုးရကလိုအပ်သလိုပံ့ပိုး၍ အမျိုးသမီးဘဝဘက်စုံ
ဖွံ့ဖြိုးရေးကို ဆောင်ရွက်ဖေါ်ဆောင်မည်။
***********************************
(ပြည်သူ့ကျန်းမာရေးကဏ္ဍ)
ကျန်းမာရေးကဏ္ဍကို အစဉ်ခေတ်နှင့်အမီ လျော်ညီစွာတည်ဆောက်မည်။ အပြည်ပြည်ဆိုင်ရာကျန်းမာရေးလုပ်ငန်းများနှင့် ရင်ဘောင်တန်း၍ ပြည်သူတစ်ရပ်လုံး ကျန်းမာရေးကို ထိရောက်စွာဆောင်ရွက်သွားမည်။
ပြည်သူ့ကျန်းမာရေးစောင့်ရှောက်မှုကို အနောက်တိုင်းဆေးပညာနည်း တိုင်းရင်းဆေးပညာနည်း တို့ဖြင့် ရောဂါကာကွယ်ရေး ကုသရေး ပညာပေးရေးကဏ္ဍ ဆေးပညာသင်ကြားရေးကဏ္ဍ
ဆေးသုတေသနပြုစုရေးကဏ္ဍ အားကစားနှင့် ကာယပညာဆောင်ရွက်ရေးကဏ္ဍတို့ဖြင့် ဘက်စံဖွံ့ဖြိုးအောင် ကျင့်သုံးဆောင်ရွက်မည်။
တစ်မျိုးသားလုံးကျန်းမာရေးကို နိုင်ငံတော်အပိုင်း လူမှုဖူလုံရေးစောင့်ရှောက်မှုဘုတ်အဖွဲ့အပိုင်း သမဝါယမနှင့်ဖက်စပ်အပိုင်းအပြင် ပုဂ္ဂလိကလုပ်ငန်းပိုင်းများဖြင့်ဆောင်ရွက်သွားမည်။
တောင်သူလယ်သမားဒအများစုကြီးဖြစ်သော ကျေးလက်ပြည်သူများ၏ ကျန်းမာဖွံ့ဖြိုးရေးအတွက် အပြည်ပြည်ဆိုင်ရာ ပြည်သူ့ကျန်းမာရေးစီမံချက်ကြီးဖြင့် အထူးအလေးပေးဖေါ်ဆောင်မည်။
ကျေးလက်ဆေးပေးခန်းများကိုအခြေခံကာ ကျေးလက်ဒေသအတွင်း လှည့်လည်ဆေးကုသရေး
စနစ်ကို ရှေးရှုအကောင်အထည်ဖေါ်မည်။
(က) အဓိကအားဖြင့် ပြည်သူလူထု ကျန်းမာရေးအတွက် အနာရောဂါကြိုတင်ကာကွယ်ရေးကိစ္စများကို လိုအပ်သလိုစီမံချက်ချမှတ်၍ ဆောင်ရွက်သွားမည်။
(ခ)အစိုးရဆေးရုံများတွင် အနာရောဂါကုသရေးအတွက် လိုအပ်သောဆေးဝါးများကို လုံလောက်အောင် ရရှိနိုင်စေရန် အထူး အလေးထားစီစဉ်ဆောင်ရွက်မည်။
(ဂ) အစိုးရဆေးရုံများတွင် အဖက်ဖက်၌ ယိုယွင်းချို့တဲ့နေသော အခြေအနေများကိုဖြေရှင်း၍ ဆေးရုံ၏အင်္ဂါရပ်များနှင့်ညီညွတ်သော အခြေအနေသို့ရောက်ရှိအောင်ဆောင်ရွက်မည်။
(ဃ) ပုဂ္ဂလိကဆေးရုံနှင့် ဆေးကုခန်းများကိုလည်း ဥပဒေနှင့်အညီ ဖွင့်လှစ်ဆောင်ရွက်ခွင့်ပြုမည်။ ပုဂ္ဂလိကကျန်းမာရေးအာမခံလုပ်ငန်းကို အားပေးမည်။
(င) အားကစားနှင့် ကာကပညာကို နိုင်ငံတော်ကအားပေး၍ အပြည်ပြည်ဆိုင်ရာ အားကစားပြိုင်ပွဲများ
တွင် အဆင့်အတန်းမြင့်မားစွာ ပါဝင်နိုင်ရန်အတွက် လိုအပ်သောလေ့ကျင့်မှုများ ပြုလုပ်ပေးမည်။
(စ) ဆေးကုသနည်း ဆေးပညာများနှင့် စပ်လျဉ်း၍ တိုးတက်သောခေတ်မီနည်းပညာ အထောက်အကူများရရှိရေးတို့အတွက် ကမ္ဘာ့ကျန်းမာရေးအဖွဲ့နှင့် နိုင်ငံခြားတိုင်းပြည်အသီးသီးရှိ ဆေးပါရဂူများနှင့် ဆက်သွယ်ပူးပေါင်း ဆောင်ရွက်သွားမည်။
*******************************
လေးစားစွာဖြင့်
ကိုစိုးဝင်း
